O‘zbekistonda emlanganlik sertifikatini olgan fuqarolar o‘rtasida qimmatbaho yutuqli o‘yin tashkil etiladi. Bosh sovrin — avtomobil

O‘zbekiston Sog‘liqni saqlash vazirligi ishbilarmon va tadbirkorlardan o‘z xodimlarini 2022-yil 20-yanvarga qadar koronavirusga qarshi emlashni hamda sababsiz emlanmaganlarni ishga qo‘ymaslik choralarini ko‘rishingizni so‘radi.

Ma’lum qilinishicha, bosh davlat sanitariya vrachining 2021-yil 17-iyuldagi 11-son qarorida 18 yoshdan katta aholi qatlamini koronavirus infeksiyasiga qarshi emlash belgilangan. Mehnat kodeksining 113-moddasiga ko‘ra, xodim emlanishni rad etsa, ish beruvchi uni ishga qo‘ymaslikka haqli.

Shularga ko‘ra, ishbilarmon va tadbirkorlardan o‘z xodimlarini 2022-yil 20-yanvarga qadar koronavirusga qarshi emlanishini ta’minlash hamda sababsiz emlanmaganlarni ishga qo‘ymaslik choralarini ko‘rish so‘ralgan.

Ma’lumot uchun:

• emlashga qarshi tibbiy ko‘rsatmalari bor fuqarolar bundan mustasno. Tibbiy cheklovlar ro‘yxati Sog‘liqni saqlash vazirligining internetdagi resurslarida mavjud;
• 20 nafardan ortiq emlanuvchisi bor tashkilotlarga esa sayyor emlash brigadasini jalb etish imkoniyati ham yaratilgan;
• eng muhimi, emlash bepul amalga oshiriladi.

Ta’kidlanishicha, 2022-yilning yanvar, fevral va mart oylarida emlanganlik sertifikatini olgan fuqarolar o‘rtasida qimmatbaho yutuqli o‘yin (bosh sovrin — avtomobil) tashkil etiladi.

Emlash masalalari bo‘yicha murojaat uchun Sanitariya-epidemiologik osoyishtalik va jamoat salomatligi xizmatining telefon raqami — 78-888-01-01.