Махсус имкониятлар
Жамиятдаги ҳар бир шахс ўз ҳаёти давомида яхши яшашни, бекаму-кўст фаровон ҳаёт кечиришни ҳоҳлайди. Кимлардир ҳалол меҳнати билан ном қозонса, кимдир қинғир-қийшиқ йўлни ўзига раво кўради. Пора олади, давлат пулини талон-тарож қилади, фирибгарлик каби йўллар билан кун кечиришни ўзига раво кўради. Бу эса ўз ҳаётига, Ватанига хиёнатдир.
Пора олиш йўли билан бойлик орттирган бўлса, “ҳалоли бўлсин” дейишга аслида ҳаққимиз йўқ.
Коррупция –бу бизнинг кундалик ҳаётимизга айланиб бораётган, мамлакатни, жамиятни ва миллат келажагини таназзулга олиб келадиган кўринмас ёвдир. Айниқса ривожланишнинг янги босқич йўлидан бораётган бизнинг мамлакатимизда бундай иллатга барҳам берилиши керак.
Кузатаётган бўлсангиз ижтимоий тармоқлар орқали ҳар куни фалон ташкилотда ишлайдиган ходим пора билан қўлга тушибди ёки фалон ташкилотда давлатнинг шунча пули талон-тарож қилинибди, деган хабарларга дуч келишимиз одатий ҳолга айланиб бормоқда. Бундан ташқари Ўзбекистон Республикаси бош прокуратураси томонидан ижтимоий тармоқлар орқали йил давомида қайси давлат идоралари томонидан қанча давлат пуллари ўзлаштирилаётганлиги очиқ айтилмоқда. Айниқса халқ таълими, тиббиёт соҳаларида бундай кўрсаткичлар юқори эканлиги ачинарли. Тасаввур қилинг, биз таълим-тарбия берадиган, келажак авлодни тайёрлайдиган соҳа бўлмиш халқ таълимида бундай ишларнинг бўлиши, биз тарбиялаётган келажак авлодга салбий таъсир кўрсатиши турган гап.
Ахир уларда ҳам мойиллик ўйғонмайдими? Биз ўзимиз билмаган ҳолда келажак авлодга “ўрнак” бўлмаяпмизми? Мактаблар қурилиши ва таъмирланишидаги ўз “манзилига” етиб бормаётган давлат пуллари, фарзандларимизнинг яхши таълим олиши учун қилинаётган шунча саъй-ҳаракатлар, албатта дилни хуфтон қилмай қолмайди. Ёки тиббиёт соҳасини олайлик, инсон тақдирини ҳал қиладиган соҳада ҳам бундай ҳолатлар кузатилиши, инсонийликка тўғри келадими?...
Зеро, муҳтарам Президентимиз ҳар бир мурожаатларида бундай иллатга қарши муросасиз курашиш кераклиги тўғрисида қайта-қайта такрорламоқда.
Бундан ташқари “Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида”ги Президент Фармони ҳам қабул қилинди.
Фармонга мувофиқ, “Коррупцияга оид жиноятларни содир этишда айбдор деб топилган шахсларнинг очиқ электрон реестри” юритилади.
Реестрга киритилган шахсларга қуйидагилар тақиқланади:
- давлат хизматига қабул қилиниши ва давлат мукофотлари билан тақдирланиши;
- сайланадиган ва алоҳида тартибда тайинланадиган лавозимларга номзодларининг кўрсатилиши;
- давлат органлари ҳузуридаги жамоатчилик кенгашлари ҳамда идоралараро коллегиал органларнинг аъзолигига киритилиши;
- уларнинг тадбиркорлиги давлат харидларида ва давлат-хусусий шериклик битимида иштирокчи (ижрочи) сифатида қатнашиши;
- давлат улуши 50 фоиздан юқори бўлган ташкилотлар ҳамда давлат таълим муассасаларида раҳбарлик лавозимларида фаолият юритиши.
Бундан ташқари муҳтарам Прездентимиз “коррупция” содир этган шахсларга нисбатан “қатъий жазо” муқаррар эканлигини ҳам қайта-қайта такрорлаб ўтдилар.
Келинг азиз юртдошлар, бу иллатдан воз кечайлик. Юртимиз равнақи учун ҳақиқий соф қалбли фарзанд бўлиб курашайлик.
Шу юртнинг ривож топишида, дунё мамлакатлари тамаддунида бундан-да юксак чўққиларни эгаллашимизда, ёшларимизни тарбиясида, жамиятни бундай иллатлардан тозалашда барчамиз бирдек маъсул бўлайлик. Коррупция бор экан - давлат ҳеч қачон ривожланмайди. Чунки, у тараққиётнинг кўринмас кушандасидир.
Муталлиб Рахимов,
Халқ депутатлари Иштихон
туман Кенгаши “Қонунийликни
таъминлаш ва коррупцияга
қарши курашиш масалалари
бўйича доимий комиссия” раиси.
