ФАРЗАНДИНГИЗ ВАҚТИДА ЭМЛАНМОҚДА(ми)?

jpg jpeg gif png txt doc docx xls xlsx pdf ppt pptx pps ppsx odt ods odp mp3 mov mp4 m4a m4v mpeg avi ogg oga ogv weba webp webm

Вакцинация – иммунитетни кучайтиради ва касалликнинг олдини олади. Врач маслаҳатига амал қилиб, ҳар гал тайинланган вақтда болани эмлашга олиб бориш жуда муҳим. Профилактик эмлашлар она ва бола касалликлари, ўлимининг кескин камайишига, чилла даври касалликларининг олдини олишга, соғлом авлод шаклланишига ёрдам беради. 

    Вакцинация – бу болани ҳаёт учун хавфли бўлган касалликлардан ҳимоя қилувчи ягона йўлдир. Бунда шифокорнинг малакаси ва билими ҳам муҳим аҳамият касб этади. Шифокор болага мутлақо зарар етказмаслиги керак.

   Мамлакатимизда ҳар йили 2,5 миллиондан ортиқ болалар эмланади ва эмлаш қамрови ҳозирги кунда 96% дан юқори кўрсатгичда бўлиб, аҳолига 3000 дан ортиқ эмлаш пунктлари хизмат қилмоқда. ЖССВ ва ЮНИСЕФ билан ҳамкорликда вакцинациялар билан узлуксиз таъминлаб келмоқда. Энг муҳими эса совуқлик занжири тизимига қатъий амал қилиниб, бу борада қатор тадбирлар фаол олиб борилади.

    Совуқлик занжири нима? Бу ваксинациянинг ишлаб чиқарилгандан бошлаб, ишлатилгунга қадар бўлган давр. Бу даврга унинг ишлаб чиқарилган корхонадан бошлаб махсус омборхоналарга олиб бориш ва совутгичларни бир хил ҳароратда сақлашдир. Ундан сўнг автомашиналар ёрдамида ҚВП ларга етказиш ва музлатгич тизимини компютерларда кузатиб боришни талаб қилади. Бунда хатоликка йўл қўйилмаслиги зарур.

    Бугунги кунда кўплаб вакцинация сақлаш омборлари қурилиб, фойдаланишга топширилмоқда. Жумладан, вилоятимиз бўйича Пастдарғом, Каттақўрғон ва Жомбой туманида ҳам вакцинация сақланадиган омборхоналар қурилиб фойдаланишга топширилди. Бундан ташқари автомашиналар ва 74 та замонавий музлатгичлар ҳам ҚВП лар ихтиёрига ўтказилди. Бу албатта юртимизда болалар саломатлигига бўлган эътиборнинг далилидир.

   Аммо, шунча бўлаётган янгиликлар ва қулайликларга қарамасдан, кўплаб оналар ва қайноналар боланинг эмланишига беътибор бўлишмоқда. Уч ёшга кирган қизимни Гепатит А га қарши пуллик эмлатдим. Поликлиникага борганимда бир нечта аёллар “шартмикан эмлатиш”, “балки касал бўлмас” дея мурожаат этишди. Тўғри бу мажбурий эмас. Аммо, агар бола шу касаллик билан касалланса вакцинадан икки- уч баробар кўп пул кетади, камига бола азобланади. Эмлангандан сўнг эса шифокорлар фарзандимнинг 15 йилгача ушбу касалликка чалинмаслигини айтишди.

   Кўп бўлмади, интернет сайтларида Самарқанд вилоятида қизамиқ касаллиги авж олиб, касалланганлар сони ортиб бормоқда деган гаплар тарқалди. Вилоят санитария-эпидемиология мутахассислари билан бўлган семинар тренингда вилоятимизда қизамиққа чалинганлар сони ошиб кетмаганлиги, бу касаллик билан вилоят бўйича 371 та эмас балки 29 нафар бола касалланганлиги маълум бўлди. Бунинг олдини олиш бўйича эса 26 000 га яқин олти ойликдан бир ёшгача бўлган болалар муддатидан олдин эмланганлиги ҳам айтиб ўтилди. 

    Суҳбат жараёнида яна бир нарса маълум бўлдики, мустақилликдан сўнг 1991, 1992, 1993, 1994 йиллада “дифтерия” касаллигига қарши эмлашда оқсоқликлар бўлган ва 50 % гача болалар эмланмасдан қолганлиги айтиб ўтилди. Бунинг далили эса ўша йилларда туғилган болаларнинг кўпчилиги ушбу касаллик билан касалланган.

      Шундай экан фарзандларимизни ҳар бир касалликка қарши эмланишига эътиборли бўлайлик. Тиббиётда вакцинация поликлиникада, махсус вакцина ўтказиш марказларида ўтказилмоқда. Вакцина ўтказаётган шифокор етарлича билим ва маҳоратга эга бўлиши, айниқса бир ёшгача бўлган болаларда айрим гуруҳ вакциналари қатъий жадвал бўйича ва шифокор назорати остида ўтказилиши шарт.

     Матлуба РАББИМОВА,

    ЮНИСЕФ ва вилоят санитария-эпидемиология мутахассислари билан бўлган семинар тренинг материаллари асосида тайёрланди.

2015-2024 © Иштихон туман ҳокимлиги. Сайт яратувчиси: SAKTRM