Ҳурматли юртдошлар! Маълумки, 16 мартдан бошлаб Ўзбекистонда коронавирус тарқалишига қарши профилактика мақсадида карантин ҳолати эълон қилинди.
Аммо, бу одамлар орасида асоссиз ваҳима ва шов-шувлар тарқалишига сабаб бўлмаслиги керак. Аҳоли саломатлигини сақлаш, зарур ҳолатларда юқори малакали тиббий ёрдам кўрсатиш, халқимизни озиқ-овқат ва бошқа зарур нарсаслар билан таъминлаш масаласи тўла назоратга олинган.

Бугун эрта тонгда 1 нафар Ўзбекистон фуқаросида коронавирус инфекцияси аниқлангани ҳақида хабар тарқалди.

Вазиятни назорат қилиш, коронавирус инфекцияси кириб келишининг олдини олиш чора-тадбирларини кучайтириш мақсадида Ўзбекистон Республикаси Бош вазири Абдулла Арипов шошилинч йиғилиш ўтказди.

Ўзбекистонда короновирус инфекциясининг тарқалиши ва унга қарши кўрилаётган чоралар бўйича аҳолини тўғри, холис ва аниқ маълумотлардан тезкор хабардор қилиш мақсадида Koronаvirus info (@koronavirusinfouz) расмий канали очилди.

Ушбу канал Ўзбекистон Республикаси Соғлиқни сақлаш вазирлиги, Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги ҳамда Ўзбекистон Ёшлар иттифоқи ҳамкорлигида ташкил қилинди.

Вазирлар Маҳкамасининг “Боғдорчилик ва иссиқхона хўжаликларини ҳамда мева-сабзавот кластерларини қўшимча молиявий қўллаб-қувватлаш чора-тадбирлари тўғрисида”ги қарорига асосан Ўзбекистон Республикасининг тўғридан-тўғри инвестициялар жамғармаси маблағлари, тижорат банклари томонидан халқаро молия институтлари ва хорижий ҳукумат молия ташкилотларидан жалб этилган кредитлар боғдорчилик ва иссиқхона хўжаликларини ҳамда мева-сабзавот кластерларини қўллаб-қувватлашнинг қўшимча молиявий манбалари этиб белгиланди.