АЗИЗ ТУМАНДОШЛАР!

Ўзбек тили—ўз тилимиз ҳақида фахр билан сўзлаймиз. Ватан, она, муқаддас, ҳурмат  деган сўзлар она тилимизда ўзгача жаранглайди.  Яхши биламиз, тил бу халқларнинг эътиқоди. Тил ҳар бир миллатнинг асосини белгилаб  берувчи маънавий хазина. Бугун дунёда  7000 га яқин тил ва лаҳжалар бўлиб, улардан атиги  178 таси  Давлат тили мақомига эга. Ҳар бир миллат ўз тилини севади, ардоқлайди. Бизнинг ўзбек тилимиз ҳам давлат тили мақомига эга бўлган тиллар орасида эканлигини мамнуният билан таъкидлаймиз.

 Тўғри, биз бошқа тилларни ҳам қадрлаймиз, дўстлик нигоҳи ила боқамиз, сўзлашамиз, ўрганишга ҳаракат қиламиз. Ҳамкорликни йўлга қўйиб бир-биримизнинг  миллий урф-одатларимизга ҳавас қиламиз. Буларнинг барчаси ўз йўлига. Ўзбек-ҳар қандай миллат ва элатга бағрини очган меҳрибон халқ эканлиги дунёга маълум.

  Шукроналар бўлсинки,  мамлакатимизда кейинги тўрт йил ичида тил билан уни асраш, қадрини юксалтириш, бойитиш билан боғлиқ жуда кўп ҳужжатлар  қабул қилинди ва  21 октябрь санаси “Ўзбек тили байрами куни” деб эълон қилинди. Бу эътибор ва эътиқод самарасидир.  Қолаверса  она тилимизнинг жаҳон минбарига ўз кўркини намойиш этаётганлиги деб биламиз.

Айниқса, Президентимизнинг  Бирлашган Миллатлар Ташкилотидаги олий анжуманда  Навоий тилида нутқ сўзлаши бутун халқимизнинг кайфиятини кўтарди, аниқроғи тилимизга бўлган ихлосимизни яна ҳам оширди.  Бу ўзбек тилимизга бўлган меҳр-муҳаббат, эътибор ҳосиласидир.

21 октябрь-Ўзбек тили байрами куни тумандаги  МТТ лари, умумтаълим мактаблари, касб-ҳунар масканлари, қисқаси барча жамоаларда шоду -хуррамлик билан нишонланмоқда.  Тилимиз дунё узра жаранглайверсин, азиз ва муқаддас айём муборак бўлсин, юртдошлар!

 Шерзод Ибрагимов,

 Иштихон туман ҳокими в. в. б.