Hosilning mo‘l bo‘lishi to‘g‘ri tanlangan agrotexnik yondashuvlarga bog‘liq

Bugun Samarqand viloyatiga ishchi tashrif doirasida O‘zbekiston Respublikasi qishloq xo‘jaligi vaziri Ibroxim Abduraxmonov Ishtixon tumanida bo‘ldi. Tashrif davomida vazirga 
tuman hokimi Fazliddin Ruziyev
hamrohlik qildi.

Mehmonlar “Asalchi Eldor” fermer xo‘jaligidagi 11 gektarlik paxta maydonida olib borilayotgan agrotexnik ishlar bilan yaqindan tanishdilar. Mazkur maydonda mahalliy “Sulton” navi zamonaviy xorijiy texnologiya asosida 76x10 sxema tartibida qo‘shqator usulida ekilgan. Shuningdek, tomchilatib sug‘orish tizimi qo‘llanma talablari asosida joriy etilgani va belgilangan me’yorlar asosida ko‘chatlar o‘tqazilgani ma’lum qilindi.

Mutaxassislarning ta’kidlashicha, kutilayotgan hosildorlik gektariga 
65–70 syentner
 atrofida baholanmoqda. Vazir tomonidan fermer va dehqonlar uchun ishlab chiqilgan uslubiy qo‘llanmadan samarali foydalanish zarurligi ta’kidlandi. 

Shu bilan birga, ekinlarni oziqlantirishda belgilangan me’yor va tartiblarga qat’iy amal qilish, agrotexnik amaliyotlarda ilmiy yondashuvlarni izchil joriy etish bo‘yicha mas’ullarga aniq topshiriqlar berildi.

Shu tariqa, hosilning mo‘l va sifatli bo‘lishi to‘g‘ri tanlangan agrotexnik qarorlar hamda ularni qat’iy bajarishga chambarchas bog‘liq ekani yana bir bor e’tirof etildi.
——
ISHTIXON TUMANI HOKIMLIGI AXBOROT XIZMATI