Tuman hokimi tibbiyot muassasalaridagi yangilanishlar va mavsumiy tayyorgarlik ishlarini o‘rgandi

Bugun Ishtixon tumani hokimi Fazliddin Ruziyev tegishli soha rahbarlari hamrohligida tibbiyot sohasida amalga oshirilayotgan o‘zgarishlar, mavjud sharoitlar hamda ko‘z-qish mavsumiga tayyorgarlik ishlari bilan joyiga chiqib tanishdi.

Tanishish davomida tuman markaziy shifoxonasidagi sharoitlar, tibbiy uskunalarning holati, dori-darmon zaxirasi hamda isitish tizimlarining tayyorligi o‘rganildi.

Hokim tibbiyot muassasalaridagi islohotlar aholiga sifatli xizmat ko‘rsatishda muhim ahamiyat kasb etishini ta’kidlab, mavsumiy kasalliklarning oldini olish bo‘yicha profilaktik chora-tadbirlarni kuchaytirish zarurligini qayd etdi.

Shuningdek, mas’ul rahbarlarga shifoxona va poliklinikalardagi sanitariya-gigiyena talablariga qat’iy rioya etish, isitish tizimlarini to‘liq tayyor holatga keltirish hamda shifokorlar uchun qulay mehnat sharoiti yaratish yuzasidan tegishli ko‘rsatmalar berildi.
——
ISHTIXON TUMANI HOKIMLIGI AXBOROT XIZMATI