Махсус имкониятлар
Ўктамова Нигина Жасур қизи 2003 йил 14 июнда Иштихон туманида туғилган. Нигина ёшлигидан спортга меҳр қўйди. Буни илғаган отаси Жасур Саидов ва онаси Лайлохон Саидова унинг ўқишини шаҳар марказидаги 33-умумтаълим мактабига ўтказишди. Шу тариқа ўқиши ва спорт машғулотларига қатнашиши учун имконият яратилди. 2018 йилда тоғаси Аҳмаджон Норхўжаев тумандаги бокс залига уни илк бора олиб боради. Вақт ўтгани сайин ундаги маҳорат кўзга ташланиб борди, ўзига бўлган ишончи яна ҳам ортди. Мусобақаларга қатнашиб, юқори натижаларга эриша бошлади. 2019 йилда илк маротаба Жиззах вилоятида бўлиб ўтган Ўзбекистон чемпионатида қатнашди ва фахрли 1-ўринни қўлга киритди.
Шу тариқа мусобақалар давом этиб борди. 2019 йилда Қозоғистоннинг Олмаота шаҳрида бўлиб ўтган Халқаро турнирда Нигинага омад кулиб боқди ва фахрли биринчи ўринни қўлга киритди. Ўша йили БАА нинг Фужайра шаҳрида бўлиб ўтган Осиё чемпионатида, 2020 йилда Наманган вилояти 2021 йил Тошкент шаҳрида бўлиб ўтган Ўзбекистон чемпионатларининг барчасида Нигина Ўктамова фахрли 1-ўринни эгаллади.
2021 йил 20-21 февраль кунлари Черногориянинг Будва шаҳрида бўлиб ўтган "Adriatic Pearl" Халқаро турнирида умумжамоа ҳисобида биринчиликни Ўзбекистонлик боксчилар эгаллашди. Мусобақа якунига кўра, мураббий Ҳамид Тангрибергенов бошчилигидаги ёш йигит-қизларимиз 5 та олтин, 3 та кумуш ва 7 та бронза медалларига сазовор бўлишди. Ушбу турнирда Иштихон Болалар-ўсмирлар спорт мактаби тарбияланувчиси, 57 килограмм вазн тоифасида рингга кўтарилган Нигина Ўктавома ҳам иштирок этиб Европа ва МДҲ давлатлари вакилалари билан жанг олиб борган Нигина рақибларининг барчасидан устун келди ва жамоа ғалабасига муносиб ҳисса қўшди.
Апрел ойида Польшанинг Кельце шаҳрида бокс бўйича ёшлар ўртасида жаҳон чемпионати бўлиб ўтди. Мусобақада -54 кг вазн тоифасида юртимиз шарафини ҳимоя қилаётган Нигина Ўктамова барча рақибаларини мағлуб этган ҳолда финалгача етиб келганди. Ҳал қилувчи жангда украиналик Кристина Лакичукка қарши тўқнаш келди ва 4:1 ҳисобида ғалабага эришди ва Жаҳон чемпиони бўлди.
Қайд этиш лозимки, бунгача Ўзбекистон ёшлар терма жамоаси қизлари хеч қачон ЖЧ финалига қадар етиб кела олишмаган. Бу борада Нигина ўзбек бокси тарихида янги саҳифа очди десак муболаға бўлмайди.
Яқинда эса Ўзбекистон Республикаси Президентининг “Ёшлар куни муносабати билан юртимизнинг фаол ва ташаббускор ёш авлод вакилларидан бир гуруҳини мукофотлаш тўғрисида”ги Фармонига асосан бокс бўйича Ўзбекистон миллий терма жамоаси аъзоси иштихонлик Ўктамова Нигина Жасур қизи “Шуҳрат” медали билан тақдирланди.
Бундан ташқари бу йилги «Таҳсин» ёшлар мукофотини топшириш маросими ёшлар учун чинакам эсда қоларли воқеага айланди.
Ёш истеъдод соҳиблари, инсонлар ҳаётини сақлаб қолиш йўлида жасорат кўрсатган қаҳрамонлар, миллионлаб ёшларни эзгу ғоялар атрофида бирлаштираётган ташаббускор йигит-қизларни муносиб эътироф билан табриклаш мақсадида ўзбек эстрадасининг машҳур юлдузлари ўз репертуарларидаги ретро қўшиқларни кавер усулида ижро этишди.
Тадбирнинг ўзига хослиги шундаки, у хориждаги GQ, «Оскар», Forbes ва шу каби бошқа йирик мукофотларнинг энг яхши анъаналари форматида ташкил этилди. Ғолиб ва номинантлар қизил йўлакча бўйлаб юриб келишди, ғолибларга мукофотни қўлга киритгандаги таассуротлари билан ўртоқлашиш учун сўз берилди.
«Таҳсин – 2021» ёшлар мукофотининг совриндорлари орасидан Нигина Ўктамова ҳам ўрин эгаллади.
Бу ютуқларнинг барчаси тинимсиз қилинган меҳнат ва сабрнинг мукофотидир. Бу албатта бошланиши, Нигина Ўктамова ҳозирда 2021 йил 15 август куни БААда бўлиб ўтадиган Осиё чемпионатига пухта тайёргарлик кўрмоқда. Нафақат иштихоннинг фахри балки юртимизнинг шарафи бўлган ёш боксчига фақат ва фақат омадлар тилаймиз, ютуқларингиз бардавом бўлсин!
Матлуба РАББИМОВА.
